حوار: داليا أيمن
في البداية… عرفنا بنفسك وبداية دخولك للمجال؟
أنا عمر حجازي، مخرج تلفزيوني.
بدأت مشواري بعد ما اكتشفت إن الإخراج هو المجال اللي أنا فعلاً شايف نفسي فيه. كنت بحب التمثيل من زمان، لكن مع الوقت لاقيت إن الإخراج هو اللي مناسب لطريقتي في الشغل وتفكيري وشغفي.
ما دافعك لإختيار مهنة الإخراج بالذات؟
لما جربت التمثيل حسّيت إن الإخراج أقرب ليا، وبيديني مساحة أكبر للتعبير. كل واحد فينا بيختار اللي بيشوف نفسه فيه، وأنا فرصتي وحلمي كانوا ناحية الإخراج من البداية.
كنت مهتم بالفن والإخراج من زمان، ولا اكتشفت شغفك مؤخرًا؟
من زمان وأنا مهتم بالتمثيل، لكن الشغف الحقيقي ظهر لما اتعلمت الإخراج وبقي عندي خبرة كافية أقدر أتعامل بيها كمخرج.
ما هو أصعب شىء واجهك في بداية مشوارك؟
أصعب حاجة كانت الإحباط.. خصوصًا لما بيجي من الناس القريبين. ده بيكسر أي حد، بس قدرت أتجاوزه بالعند والإصرار.
هل كان في حد ألهمك تدخل المجال؟
الموضوع جه من تجربتي الشخصية أكتر، مش من شخص معين. شغفي بالإخراج هو اللي سحبني للمجال.
حاليًا إيه نوع المشاريع اللي شغال عليها؟
شغال على مؤتمر باسم الفرقة، وبعده فيلم، وبعده مسرحية.. وكلهم جاهزين وكلهم للتلفزيون.
لما بتشتغل على أي عمل.. إيه أهم حاجة بتحطها في بالك؟
النجاح. إن العمل يطلع بشكل محترم ويبقى له رسالة.
أكتر حاجة ممتعة وصعبة في الإخراج؟
الممتعة: لحظة نجاح العمل.. وإني أغلب نظرة الناس السلبية.
الصعبة: إنك تبذل مجهود وتتعِب وفي الآخر ماتلاقيش التشجيع الكافي.
تفضل السينما ولا التلفزيون ولا المسرح؟ ولماذا؟
بفضل السينما والتلفزيون والمسرح كلهم، كل واحد له روح مختلفة وتجربة مهمة.
كيف تختار أسلوبك الفني؟
بمشي بالطريقة الإيجابية في التعامل.. سواء مع الممثلين أو في الوسط نفسه.
فيه مخرجين أو أعمال بتستلهم منهم؟
مش شرط شخص محدد.. أنا بتعلم من كل حاجة بشوفها.
لما بيكون عندك فكرة.. إزاي بتحولها لعمل؟
ببدأها كتابة على الورق، وبعدين أشتغل على تحويلها للواقع بالصورة والشكل المناسب.
بتحب الأساليب الجديدة ولا التقليدية؟
أكيد بحب أجرب كل الأساليب الجديدة.. التجربة هي اللي بتخلق الإبداع.
حلمك كمخرج في المستقبل؟
أكبر حلم عندي إني أكتشف وأصعّد المواهب اللي عندها شغف ومش لاقية فرصة. في البلد شباب كتير بتمثل ومش عارفة توصل.. وعايز أكون المخرج اللي يفتح لهم الباب ويوصلهم للتلفزيون.
لو جاك عرض كبير.. إيه أهم حاجة تخليك توافق؟
إن النص يكون مكتوب بشكل محترم وفني.. من غير ابتذال ولا ألفاظ خارجة ولا مشاهد ضد قيمنا. احترام النص هو اللي يخليني أوافق.
نصيحتك للشباب اللي عايزين يدخلوا مجال الإخراج؟
النجاح محتاج استمرار. خدت قرار؟ لازم تكمله للآخر.
الحلم بييجي بالتعب والاجتهاد.. اروح واجي واتعب لحد ما أوصل.
أنا باعتبر القرار “نذر”.. مدام قلته يبقى لازم أوفي بيه.
