كتبت: منار محمد
بعد الظلام نور وبعد العسر يسر، تتمثل تلك المقولة في وصف قصة نجاح الشاب عز الدين المليح، الذي واجه العديد من الصعوبات في بداية حياته ولكنه تحدى الصعاب وتغلب عليها وأصبح مثال ملهم يحذى به كل شاب غالبتة الصعاب
حدثنا عنك؟
أنا عز الدين المليح من الاسكندرية العصافرة بحري، شيف عمومي ومؤسس براند مسمط ومشويات مدفع ٣٨ سنة بعمل اكلات وميكسات جديدة وبجتهد في تغيير مفهوم المسمط والأكلات الشعبية الثقيلة اللي تحتاج مهارات عالية في النضافة والجودة ومخترع طاجن السقسقوليا والبشتكة ومكتشف المشنكاح وغيره من الميكسات والأطباق الجديدة في عالم المسمط والأكلات الحرشة
حدثنا عن بدايتك؟
البداية بدأت بعد أصابتي في العمل الميداني التابع للشركة الخاصة اللي كنت شاغل فيها اسمها تساهيل للتمويل متناهي الصغر ونتج عنها الإصابة بعجز جزئي مستديم في رجلي وبعدها تم فصلي وتخلي الشركة عني، بدأت افكر اعمل إيه خصوصا اني بعول أسرتي ووالدي متوفي جاتلي الفكرة خصوصا اني من أفضل مواهبي الطبخ ودخول المطبخ واي ومكان بكون متواجد فيه انا الراعي الرسمي لعمل الاكل.
لماذا اخترت مجال الطعام والمطاعم تحديدًا؟
اخترت المجال ده بعد لما لقيت إن الموضوع بقى مطلب من كل اللي حواليا خصوصا اني معروف في وسط كل اللي يعرفوني من أقارب، أصدقاء، زملاء ومعارف ان نَفَسي حلو جدا في الأكل وأن دي موهبة، فكرت افتح المطعم بعد ما حولت الموضوع من موهبة وهواية إلى وظيفة وممارسة، فبدأت اقرأ كتير على النت واتفرج على فيديوهات واخترت أصعب ما في مجال الاكل وهو المسمط؛ خصوصًا إن المسمط محتاج مهارة عالية جدا وانا حبيت اتحدى عجزي واختار الصعب، و بفضل الله عملت جمعية ب ٢٠ الف جنيه وبدأت مشروعي
هل واجهتك سلبيات معينه في بداية طريقك وكيف استطعت التغلب عليها؟
والله السلبيات اللي واجهتني كتير جدا لكن بعتذر عن ذكرها، ولكن مش هنسى جملة اتقالتلي من إحدى المسؤولات عن العمل لما قالتلي مينفعش تعرج قدام العملاء ومش هينفع تكمل شغل معانا، لكن زي ما كان في سلبيات كان في إيجابيات كتيرة زي دعم ناس كتير ليا وتشجيعيهم ليا، وكلامهم اللي بيحفزني دايما رغم معاناتي في الوقفة كتير او الحركة بسبب الشريحة المعدنية اللي مثبتة الركبة
هل تحققت أحلامك التى كنت تحاول من أجلها مرارًا وتكرارًا؟
اه الحمد لله ومن الحاجات اللي حققتها ان كان نفسي يكون ليا مطعم متوفر فيه صالة ومكان يليق بعملائي وزبايني لأن ربنا اكرمني بطبقة راقية جدا قدرت قيمة المنتج ونضافتة وجودة الأكل عندي فتعاونت مع شريك نجاح وبالفعل أفتتحنا المطعم الجديد في العصافرة بحري ووفرنا خدمة صالة وخدمة بيع فوق الممتازة بشهادة كل زبايني.
بماذا يتميز مطعمك عن باقي مطاعم المسمط تحديدا؟ وما الأصناف الأكثر طلبًا وشعبية لديك؟
قدرت اتميز عن باقي مطاعم المسمط بالذات في تقديم النوع ده من الأكل بطريقة مختلفة عن شكلها التقليدي واكتر حاجة بتحبها الناس في المطعم بالنسبة للأكل؛ الطواجن زي السقسقوليا والبشتكة والمارشميلو وبيحبوا الفتة الميكس الكوارع مع النخاع وطبق المشكل اللي بيحمل اسم المطعم طبق المدفع اللي مكوناته من أفضل وأجود انواع فواكه اللحوم، أما بالنسبة للخدمات فالحمد لله الناس مبسوطة جدًا بالمعاملة الحسنة لهم من العاملين في المطعم وخدمة الصالة.
شاركنا مقولة تؤمن بها؟
لا يحزنك انك فشلت، مادمت تحاول الوقوف على قدميك من جديد.
أترك نصيحه للشباب؟
نصيحتي لكل شاب زيي، أبدا وإياك تستسلم ومتيأسش ومتعتمدش على غيرك، إبدأ بأقل الامكانيات، اقرأ واكتسب مهارات، حدد أهدافك، استمر؛ هيقابلك صعاب كتيره اوي بس مع كل صعب هتتعلم حاجة جديدة وهتزيد مهارة وخبرة وخلي دايما في حياتك جانب خيري ولو بالسعي فيه، انا بجانب عملي بسعى لنشر فضيلة الإطعام ومسئول عن مطبخ خيري لنشر فضيلة الاطعام على المتعففين.
