حوار: ليلى إمام
عرفينا بنفسك؟
أنا رباب محمود، من مدينة الشروق من محافظة القاهرة.
كلمينا عن بدايتك؟
انا خريجه كلية تجارة وعندى ٣٥ سنة واول ما اتخرجت اشتغلت فى شركات كتير بشهادتى لكن بعد الجواز تركت الشغل عشان بقى عندى ابن ولما تم السنة قررت اعمله عيد ميلاد لكن بسبب الكرونا مكنش ينفع اشتريها من اى مكان فقررت اني اعملها بنفسي جبت طريقة من على النت وبدأت اعملها الوقت اللي عملتها فيه كان ممتع جدا واتبسطت فيه حسيت ان لقيت حاجة بحبها عوضتنى عن ترك شغلي، وعجبتهم كلهم ومن وقتها بدأت الفكرة، عملت تورته وكيك بوكس وكاب كيك بس لاهلى واصحابى وبعدين رزقت بطفلة تانية ووقفت شغل لفترة تانى
وبعدين قررت ارجع تانى لشغل الكيك بس يكون بيزنس ويكون لكل الناس وفعلا عملت صفحه وعملت جروب على الفيس بوك والحمدلله بدأت اشتغل من البيت ونفس الوقت اراعى اولادى
مين بيدعمك؟
أهلي وزوجي وابني وصحابي كلهم بيدعموني واوقات كتير ابني بيساعدني وزوجي كمان الحمدلله.
اي الصعوبات اللي بتواجهك؟
شغل التورت بيحتاج وقت من يومين ل ٣ أيام وطبعا دة كان صعب اعمله وانا معايا بيبى صغير بس قررت اني اتخصص اكتر فى عمل الكب كيك والكيك بوبس وميني دونتس للمدارس لان المدارس غندى فى الشروق بتطلب فى اعياد الميلاد كب كيك مش تورته عشان تكون سهله التعامل مع الاطفال
وكمان المشكلة اللي واجهتني اني في الشروق مكان بعيد وكمان فيه ناس كتير بتعمل نفس الفكرة ف كنت عاوزة ابقى شوية كريتيف ف قررت اعمل الكب كيك على شكل رسومات او حروف او ارقام بمعنى ان تصميم الكب كيك يكون بيدل على نوع المناسبة .
وهل فكرة الرسومات ساعدتك؟
طبعا، وفتحتلي فرصة اني أظهر وأكون مميزة .
أي الحاجات اللي بتميز شغلك؟
اكتشفت اني انت طول ما انت بتعملي الحاجات بمواد خام نضيفة دا بيفرق جدا جدا بالطعم، الحاجة بتاعتي كل اللي داقه حتى لو سادة قال إنها بيور وهاشة من جوة وتحسي أنها خفيفة.
هل ابتكرتي شيء خاص بيكي؟
بعمل حاجة اسمها ميني دونتس طعمه قريب من طعم الكيك لكن شكله زي الدونتس وغير اللي برة يعنى مش مقلى بيكون مخبوز عشان يكون صحى اكتر للاطفال، كمان عملت كيك بوكس بالمارشميلو لأن الأطفال كلها بتحب المارشميلو.
كمان بقيت بعمل ميني ساندوتش الحمد لله بقيت بطلع من تحت أيدي سفرة عيد ميلاد ولمة العيلة.
هل السوشيال ميديا ساعدتك؟
اه ساعدتني كتير بلاقي إعجاب كتير بشغلي ودا بيجبلي شغل كتير،
كمان اتعلمت كتير من ع النت الخامات والأشكال.
حلمك توصلي لأي؟
نفسي الموضوع يكبر لأنه بيسببلي السعادة لأن شغلي هيخلي الناس سعيدة.
